వినుకొండకు ఒక్క రూపాయి తెచ్చావా?

బొల్లా…నిన్ను చూసి ప్రజలు చీకొడుతున్నారు
ఐదేళ్లు దందాలతో బొజ్జ నింపుకున్నావ్‌
టీడీపీ అభ్యర్థి జి.వి.ఆంజనేయులు ఫైర్‌
వైసీపీ నుంచి పెద్దఎత్తున చేరికలు

వినుకొండ, మహానాడు: వినుకొండ వంద పడకల ఆస్పత్రి, గురుకుల పాఠశాలకు ఒక్క రూపాయి కూడా తీసుకురాలేని నీకు ఎందుకు ఓటేయాలని, నీ అవినీతితో విసిగి వేసారి చీకొడుతున్నారని వినుకొండ కూటమి అభ్యర్థి జి.వి. ఆంజనేయులు మండిపడ్డారు. నిధులు తేవడంలో ఎమ్మెల్యే బొల్లా పూర్తిగా వైఫల్యం చెందారన్నారు. మంగళవారం వినుకొండ నియోజక వర్గంలో అధికార వైకాపా నుంచి పెద్దఎత్తున తెలుగుదేశం పార్టీలోకి వలసలు కొనసాగాయి. వినుకొండ మండలం పెదకం చర్ల గ్రామం నుంచి 40 కుటుంబాలు, జాలలపాలెం గ్రామానికి చెందిన 25 కుటుంబాలు పార్టీలో చేరారు. వినుకొండ 22, 23వ వార్డులకు చెందిన 30 కుటుంబాలు టీడీపీ తీర్థం పుచ్చుకున్నారు.

జి.వి.ఆంజనేయులు, మాజీ ఎమ్మెల్యే మక్కెన సమక్షంలో వారంతా తెలుగు దేశంలో చేరారు. వైసీపీ ప్రభుత్వంలో ఎమ్మెల్యే బొల్లా ఒక్క ముస్లింకు కూడా రాయితీ రుణాలు ఇవ్వలేదన్నారు. ఇచ్చిన హామీల్లో ఒక్కటీ కూడా బొల్లా నెరవేర్చలేదని ఆగ్రహం వ్యక్తం చేశారు. వంద పడకల ఆస్పత్రి, గురుకుల పాఠశాలకు నిధులు తేకుండా దోపిడీకే పరిమితమయ్యారని విమర్శించారు. ముస్లింలకు టీడీపీ హయాంలో అమలు చేసిన పథకాలు రద్దు చేశారని అందుకే వారంతా దుమ్మెత్తిపోస్తున్నారని అన్నారు. ఈ కార్యక్రమంలో మాజీ ఎమ్మెల్యే మక్కెన మల్లికార్జునరావు, కూటమి నాయకులు పాల్గొన్నారు.