- నేటి నుంచి సందర్శకులకు అనుమతి
- పూర్వవైభవాన్ని సంతరించుకున్న పిల్లలమర్రిచెట్టు
మహబూబ్ నగర్, ఆగస్ట్ 21: మహబూబ్ నగర్ జిల్లాలో ప్రసిద్ధిగాంచిన పిల్లలమర్రి చెట్టు, నేటి నుండి పర్యాటకులకు అందుబాటులోకి వచ్చింది. పర్యాటక శాఖ మంత్రి జూపల్లి కృష్ణారావు ఈ రోజు ఈ ప్రాచీన మర్రిచెట్టు ప్రాంగణాన్ని పునఃప్రారంభించారు. ఈ కార్యక్రమంలో ఎమ్మెల్యేలు, జిల్లా అధికారులు, పర్యాటక శాఖ ప్రతినిధులు తదితరులు పాల్గొన్నారు.
మంత్రి జూపల్లి కృష్ణారావు మాట్లాడుతూ:
- “పాశ్చాత్య దేశాల మాదిరిగా తెలంగాణలో టూరిజాన్ని అభివృద్ధి చేయడం మా లక్ష్యం. అందుకు కావాల్సిన అన్ని సౌకర్యాలు ప్రభుత్వం కల్పించనుంది.”
- “ముఖ్యమంత్రి రేవంత్ రెడ్డి సారథ్యంలోని ప్రభుత్వం, టూరిజం మాత్రమే కాకుండా రాష్ట్రంలోని అన్ని రంగాల అభివృద్ధికి కృతనిశ్చయంతో పనిచేస్తోంది.”
- “తెలంగాణలో తూర్పు మధ్య ఆసియా దేశాలను మించే పర్యాటక కేంద్రాలు ఉన్నాయి. వీటిని మరింత విస్తృతంగా ప్రచారం చేయాల్సిన అవసరం ఉంది.”
- “రాష్ట్రంలోని ప్రతి పర్యాటక కేంద్రంలో పర్యాటకులకు కావాల్సిన అన్ని సౌకర్యాలు అందుబాటులోకి తీసుకురావడం మా ప్రథమ కర్తవ్యం.”
- “యాంత్రిక జీవితంలో విరామం కోసం టూరిజం ద్వారా వినోదం అవసరం. అందుకే టూరిజం మార్కెట్‌ను పెంచుతాం.”
- “మహబూబ్ నగర్ జిల్లాలో టూరిజం అభివృద్ధికి రూ. 5 కోట్లు మంజూరు చేస్తున్నాం. కృష్ణా నది బ్యాక్ వాటర్ ప్రాంతంలో వాటర్ స్పోర్ట్స్, బోటింగ్ వంటి సదుపాయాలను ఏర్పాటు చేస్తాం.”
- “ఉమ్మడి మహబూబ్ నగర్ జిల్లాలో పర్యాటక సర్క్యూట్ ఏర్పాటు చేయనున్నాం. ఇందులో నల్లమల అభయారణ్యం, మల్లెల తీర్థం, సోమశిల, సరళ సాగర్, కోయిల్ సాగర్ వంటి ప్రాంతాలను కలుపుతాం.”
- “రాష్ట్రంలో టెంపుల్ టూరిజం, ఎకో టూరిజం అభివృద్ధి చేయడానికి చర్యలు తీసుకుంటున్నాం. ప్రభుత్వ-ప్రైవేటు భాగస్వామ్యంతో పర్యాటక రంగం అభివృద్ధికి కృషి చేస్తాం.
ఈ కార్యక్రమంలో ఎమ్మెల్యేలు యెన్నం శ్రీనివాస్ రెడ్డి, మధుసూదన్ రెడ్డి, జిల్లా కలెక్టర్ విజయేందిర బోయి, ఎస్పీ జానకి, మహబూబ్ నగర్, స్థానిక సంస్థల అదనపు కలెక్టర్ శివేంద్ర ప్రతాప్, పర్యాటక శాఖ ఎండీ ప్రకాష్ రెడ్డి, మున్సిపల్ చైర్మన్ ఆనంద్ గౌడ్, తదితరులు పాల్గొన్నారు.